ᐱᒍᓐᓇᐅᑏᑦ

ᑕᐅᓴᓐ ᒥᑦᓯᑎᓐᓃᑑᑦ ᐃᓪᓗᑖᕈᒪᓲᑦ ᐊᕐᕌᒍᑕᒫᑦ 100-ᓃᑦᑐᑦ ᐃᓪᓗᐃᑦ ᓴᓇᔭᐅᓲᖑᑎᓪᓗᒋᑦ ᐊᕐᕌᒍᑕᒫᑦ.

ᓱᑯᑦᓯᒦᓐᓂᖓ  :
ᓱᑯᑦᓯᒦᓐᓃᑦ ᐃᓪᓗᑖᕈᒪᐅᑎᓂ ᒪᓕᒐᕐᓂᒃ ᐋᕐᕿᑕᐅᓯᒪᔪᓂᒃ ᐊᑐᕐᓱᑎᒃ ᐋᕐᕿᑕᐅᓲᖅ ᐃᓪᓗᐃᑦ ᐊᒡᒍᑕᐅᓂᖏᓐᓄᑦ ᒪᓕᒐᖅ (L.R.Q., c. S-8, r. 1) (PDF, 274KB), ᑯᐯᑉ ᑲᕙᒪᖓᓂ. ᑖᒃᑯᐊ ᒪᓕᒉᑦ ᐃᓚᐅᑎᑦᓯᓲᑦ ᐃᓪᓗᒥᐅᖃᑎᒌᑦ ᑮᓇᐅᑦᔭᓵᖏᓐᓂᒃ ᖃᑦᓯᐅᓂᖏᓐᓂᓗ ᕿᑐᕐᖓᖏᑦᑕ. 

ᐊᓯᖏᓐᓂᒃ ᒪᓕᒐᕐᓃᑐᓂᒃ ᐱᑕᖃᕐᒥᔪᖅ ᐃᓱᒪᒋᖃᓯᐅᑦᔭᐅᓲᓂᒃ ᑐᑭᑖᕋᓱᐊᓕᕐᒪᑕ ᐊᑦᑕᑐᐊᖃᕐᑑᑉ ᐱᒍᓐᓇᐅᑎᖏᓐᓂᒃ ᓯᕗᓪᓕᐅᔭᐅᒋᐊᓖᓪᓗ ᐅᑕᕐᕿᔪᑦ ᐊᓪᓚᑕᐅᓯᒪᒍᑎᖏᓐᓂᒃ.

 

ᐊᑦᑕᑐᐊᕐᑖᕈᒪᔪᑦ ᑕᑕᕐᓭᓯᒪᔪᑦ ᐊᑦᑕᑐᐊᕐᑖᕈᓐᓇᑐᑦ ᑲᑎᕕᒃ ᓄᓇᓕᓕᒫᑦ ᐃᓪᓗᓕᕆᔨᖏᓐᓂᑦ ᐅᑯᓂᖓ ᐱᑕᖃᕈᑎᒃ:

  1. ᐃᓪᓗᑖᕈᒪᐅᑎᒥᓂᒃ ᑕᑕᕐᓭᓯᒪᓗᓂ;
  2. ᐃᓪᓗᒥᒃ ᐱᒪᑦᓯᐊᕈᓐᓇᓗᓂ ᐃᓄᑑᓗᓂ ᐃᑲᔪᕐᑎᖃᕐᓗᓂᓗᓐᓃᑦ ᓴᐳᒻᒥᔨᖃᕐᓗᓂᓗᓐᓃᑦ ᐃᓪᓗᒥᒃ ᑲᒪᑦᓯᐊᖃᑎᒋᒍᓐᓇᑕᒥᓂᒃ;
  3. 18-ᓂᒃ ᐅᑭᐅᖃᕐᓗᓂ ᐅᖓᑖᓄᓗᓐᓃᑦ;
  4. ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᐃᓚᐅᔫᓗᓂ;
  5. ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᐃᓚᐅᔫᖕᖏᑯᓂ, ᑲᓇᑕᒥᐅᔭᐅᒋᐊᓕᒃ ᐅᕝᕙᓗᓐᓃᑦ ᓄᓇᓯᒪᔫᓗᓂ ᓄᓇᓕᒻᒥᐅᖑᓯᒪᓗᓂ ᐃᓪᓗᑖᕋᓱᐊᕐᕕᒥᓂ ᐊᕐᕌᒍᓕᒫᒥ ᐃᓪᓗᑖᕋᓱᐊᓚᐅᕋᓂ.

ᐃᓪᓗᑖᕋᓱᐊᕈᓐᓇᖏᑦᑐᑦ

  1. ᐃᓪᓗᑖᕋᓱᐊᕐᑐᖅ ᐁᑉᐸᖓᓗᓐᓃᑦ ᑲᑎᕕᒃ ᓄᓇᓕᓕᒫᑦ ᐃᓪᓗᓕᕆᔨᖏᓐᓄᑦ ᐊᑭᓕᑦᓴᖃᕈᓂ ᐊᖏᖃᑎᒌᒍᑎᓕᐅᖃᑎᖃᕐᓯᒪᖕᖏᓗᓂ ᐊᑭᓕᕐᑐᐃᒍᑎᑦᓴᒥᓂᒃ ᐅᕝᕙᓗᓗᓐᓃᑦ ᐊᖏᖃᑎᒌᒍᑎᓕᐅᕐᓯᒪᓗᓂ ᐊᑑᑏᓯᒪᖕᖏᑐᖅ ᐊᖏᕈᑎᒋᓯᒪᔭᒥᓂᒃ;
  2. ᐃᓪᓗᑖᕋᓱᐊᕐᑐᖅ ᐃᓚᖓᓗᓐᓃᑦ ᐊᑦᑕᑐᕈᑎᖓ ᓄᕐᖃᑎᑕᐅᓯᒪᔪᖅ ᐱᕈᔭᑎᒍᑦ ᐅᑯᐊᑎᒎᓇ 1860, 1863 ᐊᒻᒪᓗ 1971 ᐃᓅᖃᑎᒌᓐᓂᐅᑉ ᐱᖁᔭᖏᓐᓂ;
  3. ᐃᓪᓗᑖᕋᓱᐊᕐᑐᖅ ᐃᓚᖓᓗᓐᓃᑦ ᐊᓂᕐᕋᒥᐅᖑᖃᑎᖓ ᐃᓪᓗᒥᒃ ᐃᐱᕃᓐᓀᓯᒪᔪᖅ ᐅᖃᕈᑎᒋᖕᖏᓱᒍ.

ᐅᑕᕐᕿᔪᓄᑦ ᐊᓪᓚᑕᐅᓯᒪᔪᑦ

ᐅᑕᕐᕿᔪᑦ ᐊᓪᓚᑕᐅᓯᒪᒍᑎᖏᑦ ᓄᑕᐅᓯᓕᕐᑕᐅᑲᑕᓲᑦ ᓄᑖᑦ ᐃᓪᓗᑖᕈᒪᐅᑏᑦ ᒪᓕᑦᓱᒋᑦ ᐅᕝᕙᓗᓐᓃᑦ ᓱᑯᑦᓯᒦᓐᓂᖏᓐᓂᒃ ᐊᓯᑦᔨᑐᐃᒍᑏᑦ, ᐆᑦᑐᕋᐅᑎᒋᓗᒍ, ᐊᓂᑎᑕᐅᔪᑦ ᐅᕝᕙᓗᓐᓃᑦ ᐊᓪᓚᑕᐅᒍᑎᑖᕆᐊᓪᓚᑐᑦ.

ᑲᑎᕕᒃ ᓄᓇᓕᓕᒫᑦ ᐃᓪᓗᓕᕆᔨᖏᑦ ᐊᑐᐃᓐᓇᐅᑎᑦᓯᓲᖅ ᖃᐅᔨᒋᐊᕐᑕᐅᒍᓐᓇᑎᓪᓗᒋᑦ ᐅᑕᕐᕿᔪᓂ ᐊᓪᓚᑕᐅᓯᒪᔪᑦ. ᑭᓇᐅᓂᖓ ᐅᖃᕐᑕᐅᖏᒃᑲᓗᐊᕐᑎᓗᒍ. ᖃᖓᑐᐃᓐᓇᖅ ᓱᑯᑦᓯᒦᓕᕐᒪᖔᑦ ᐅᑕᕐᕿᓃᑦ ᖃᐅᔨᒋᐊᕈᓐᓇᑐᑎᑦ.