ᑖᒃᑯᐊ ᐱᖓᓱᑦ ᐊᕐᕌᒍᐃᑦ ᓄᓇᕐᔪᐊᓕᒫᒥ ᖃᓂᒪᓐᓇᖃᕐᑎᓗᒍ ᐊᑦᓱᕈᕐᓇᖃᑦᑕᓚᐅᕐᑐᑦ, ᓱᕐᕃᓱᑎᒃ ᐱᕙᓪᓕᐊᓂᖓᓂᒃ ᐱᒍᓐᓇᓯᕙᓪᓕᐊᓂᐅᑉ ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᐅᑉ ᐱᓇᓱᑦᑎᖏᓐᓄᑦ. ᑌᒣᒻᒪᑦ, “2022 ᐱᒋᐊᕐᑎᓗᒍ, ᐊᒻᒪᓗ ᑕᑯᕙᓪᓕᐊᓕᕐᓱᑕ ᓄᓇᕐᔪᐊᓕᒫᒥ ᖃᓂᒪᓐᓇᐅᑉ ᐃᓱᓕᕙᓪᓕᐊᓂᖓᓂᒃ,” ᑲᒪᔨᒻᒪᕆᒃ ᒫᑯ ᐆᑎᐊᑦ ᐅᖃᕐᑐᖅ, “ᐃᒻᒥᓂᒃ ᐅᖃᐅᑎᓚᐅᔪᒍᑦ ᑖᓐᓇ ᐊᕐᕌᒍ ᐊᕐᕌᒍᕆᔭᐅᓚᖓᒋᐊᖓ ᐱᒋᐅᕐᓴᓂᕐᒧᑦ ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᒻᒧᑦ.”

ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᒃ ᑌᒣᒻᒪᑦ ᑐᑭᑖᕐᓯᒪᕗᖅ ᐊᑐᐃᓐᓇᖃᓕᐅᒥᒋᐊᒥᒃ ᐱᓇᓱᑦᑎᒥᓄᑦ. ᐱᐅᓯᒋᐊᕆᒍᒪᔪᖅ, ᑎᒥᐅᔪᒥᑐᐃᓐᓇᐅᖏᑦᑐᖅ, ᑭᓯᐊᓂ ᐃᓄᑑᓈᕐᑎᑐᓕᒫᓂᓪᓗ ᑎᒥᐅᔫᑉ ᐃᓗᐊᓃᑦᑐᓂᒃ. ᐱᒍᓐᓇᓯᕙᓪᓕᐊᓂᕐᒨᓕᖓᔪᖅ ᐊᒻᒪᓗ ᐊᕙᑎᖃᕐᑎᓯᓂᕐᒧᑦ ᐃᓄᐃᑦ ᓇᒻᒥᓂᖅ ᐱᒋᐅᑦᓯᐊᓗᑎᒃ - ᐃᓂᒥᒃ ᐱᒍᓐᓇᓯᑦᓯᐊᕕᒋᒍᓐᓇᑕᖓᓂᒃ, ᐊᒻᒪᓗ ᐊᑑᑎᖃᕐᓂᒥᓂᒃ ᓇᕝᕚᓗᑎᒃ ᐱᓇᓱᐊᕐᑕᒥᓂ.

ᒫᑯ ᐆᑎᐊᑦ ᐅᑉᐱᕆᔭᖃᑦᓯᐊᑐᖅ ᐱᒍᓐᓇᓯᕙᓪᓕᐊᑎᑦᓯᓂᕐᒥᒃ. ᐊᐱᕆᓲᖅ ᐃᒻᒥᓂᒃ “ᖃᓅᖅ ᑎᒥᐅᔪᖅ ᐱᓇᓱᑦᑎᓂᒃ ᐱᒍᓐᓇᓂᕆᒋᐊᓕᖏᓐᓂᒃ ᐁᑦᑐᐃᒍᓐᓇᖃ ᐊᒻᒪᓗ ᓴᓇᕐᕈᑎᓂᒃ ᑎᑭᒍᑎᒋᓚᖓᔭᖏᓐᓂᒃ ᐃᓂᒋᒋᐊᓕᖏᓐᓄᑦ ᐱᒍᓐᓇᓂᕐᒥᒍᑦ?” ᐃᓱᒪᓚᐅᔪᖅ ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᒃ ᒪᕐᕈᕕᓪᓗᐊᑎᑦᓯᒋᐊᖃᕆᐊᖓ ᐱᒋᐅᕐᓴᑎᑦᓯᓂᕐᒥᓂᒃ, ᐃᓱᒪᒋᒍᓐᓀᓗᒍ ᐱᒋᐊᓪᓛᓂᑐᐃᓐᓇᐅᒋᐊᖓ.

ᑌᑲᖕᖓᓂᑦ, ᐱᒻᒪᕆᐅᓗᐊᖕᖑᐊᑎᑕᐅᓯᓚᐅᔪᖅ ᐱᕙᓪᓕᐊᑎᑦᓯᓂᖅ ᐱᒍᓐᓇᓂᖏᓐᓂᒃ ᐱᓇᓱᑦᑏᑦ. ᑐᕌᒐᐅᓚᖓᑦᓱᓂ ᐊᕐᕌᒍᖅ ᓈᖕᖏᓂᖓᓂ, “ᑐᑭᒧᐊᑦᑎᓯᔨᕗᓪᓗ ᐊᖓᔪᕐᖄᕗᓪᓗ ᐱᓇᓱᐊᕐᑎᓯᒋᐊᖃᖃᑦᑕᓯᒪᔪᑦ ᐊᑕᐅᓯᐊᕐᓗᑎᒃ ᐊᕕᑦᑐᓯᒪᓂᕐᒥ ᐊᑐᓂᑦ.”

“ᐃᓘᓐᓇᖏᓐᓂᒃ ᒪᓕᖁᔨᕗᒍᑦ ᑖᑦᓱᒥᖓᑦᐊᓭᓇᖅ ᐊᕐᖁᑎᒥᒃ,” ᐅᖃᕐᑐᖅ ᔨᐊᓂᕗ ᓚᐹᔾ, ᒫᓐᓇᓯᐅᑎᐅᑦᓱᓂ ᐱᒍᑦᔨᓂᓕᕆᕕᐅᑉ ᐊᖓᔪᕐᖄᖓ, “ᐱᒋᐅᕐᓴᕆᐊᓖᓐᓇᐅᒐᑦᑕ, ᐃᓚᐅᑎᓪᓗᖓ.” ᐱᒍᑦᔨᓂᓕᕆᕕᒻᒥ, ᐱᒋᐅᕐᓴᓂᖃᓪᓚᕆᒋᐊᓕᒃ ᐃᓘᓐᓇᑎᒃ, ᓄᓇᓕᓕᒫᓂ, ᐊᖑᒪᑦᓯᓯᐊᖁᓪᓗᒋᑦ ᐱᓇᓲᑎᓂᒃ ᒪᓕᑦᑕᐅᒋᐊᓕᓐᓂᓗ. ᓄᓇᕐᔪᐊᓕᒪᒥ ᖃᓂᒪᓐᓇᖅ ᐱᑦᔪᑎᒋᑦᓱᒍ, “ᐊᕐᕌᒍᑕᒫᕐᓯᐅᑎᒥᒃ ᐱᒋᐅᕐᓴᓂᖃᓚᐅᕐᓯᒪᖕᖏᑐᒍᑦ ᐊᕐᕌᒍᐃᑦ ᐱᖓᓱᑦ ᐅᖓᑖᓄᑦ,” ᐅᖃᕐᑐᖅ. ᑕᒪᓐᓇ ᐱᑦᔪᑎᒋᑦᓱᒍ, ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᒃ ᐊᔪᐃᓐᓇᐅᑎᖃᓚᐅᕐᑐᖅ ᐱᕙᓪᓕᐊᑎᑦᓯᓂᕐᒥᒃ ᐱᒍᓐᓇᓂᖏᓐᓂᒃ ᐱᓇᓱᑦᑎᒥᑕ.

ᐊᕐᕌᒎᑉ ᐱᒋᐊᕐᓂᖓᓂᓂᑦ, ᐊᖓᔪᕐᖄᑦ ᐊᒻᒪᓗ ᑐᑭᒧᐊᑦᑎᓯᔩᑦ ᐱᓇᓱᐊᒻᒪᕆᖃᑦᑕᑐᑦ ᑖᑦᓱᒧᖓ ᑐᕌᒐᕐᒧᑦ ᑎᑭᐅᑎᒐᓱᑦᓱᑎᒃ. ᐱᒍᑦᔨᓂᓕᕆᕕᒻᒧᑦ, ᐱᒋᐅᕐᓴᓂᖃᓚᐅᔪᑦ ᐱᓇᓲᑎᒥᓂᒃ ᑰᑦᔪᐊᒥ ᐊᓪᓚᕕᒻᒥ ᐱᓇᓱᑦᑎᓕᒫᓄᑦ. “ᑐᑦᓯᕋᓚᐅᔪᖓ COGI-ᑯᑦ ᐱᒋᐅᕐᓴᑎᑦᓯᔨᖏᓐᓂᒃ ᐅᑭᐅᕐᑕᑐᒧᑦ ᑎᑭᖁᑦᓱᒋᑦ,” ᔨᐊᓂᕗ ᓚᐹᔾ ᐅᖃᕐᑐᖅ, “ᐊᒥᓲᑦᓱᑕ ᐃᓚᖏᓐᓂᒃ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓕᓐᓂᐊᓯᒪᓚᐅᔪᒍᑦ, ᑭᓯᐊᓂ ᑌᑦᓱᒪᓂᐊᓘᓕᕐᑐᖅ. ᐃᓘᓐᓇᑕ ᐃᕐᙯᑎᑕᐅᒋᐊᕆᐊᖃᓚᐅᔪᒍᑦ ᐃᓚᖓᑎᒍᑦ.”

ᐱᓇᓱᐊᕐᕕᐅᔪᓂ ᐱᓇᓱᐊᕐᓃᑦ ᐱᑦᔪᑎᒋᓗᒋᑦ, ᐊᖓᔪᕐᖄᖓ ᐱᓇᓱᐊᕐᕕᐅᔪᓂ ᐊᐅᓚᑦᓯᓃᑦ, ᐱᓕᑉ ᐴᓭ, ᒪᓕᓚᐅᕐᑐᖅ ᐱᓇᓱᑦᑎᖏᓪᓗ ᓄᓇᓕᓕᒫᓃᑦᑐᑦ 14-ᓂ. “ᓄᓇᕐᔪᐊᓕᒫᒥ ᖃᓂᒪᓐᓇᖅ ᓴᖑᑎᑦᓯᓚᐅᕐᑐᖅ ᓯᕗᓪᓕᐅᔭᐅᒋᐊᓕᖁᑎᑦᑎᓂᒃ” ᐅᖃᕐᑐᖅ, “ᒫᓐᓇ ᑲᒪᒋᔭᖃᕈᓐᓇᓯᕗᒍᑦ ᓱᒃᑯᑎᑦᓯᑌᓕᓂᕐᒧᑦ ᓴᓇᒋᐊᓪᓛᓂᕐᒥᒃ ᐊᒻᒪᓗ ᐱᒻᒪᕆᐅᑎᓗᒍ ᐱᒋᐅᕐᓴᓂᖅ.”

ᐃᓕᓐᓂᐊᓃᑦ ᑭᖑᓕᕇᑦ ᐊᑐᑎᓯᒪᓕᕇᕐᑐᑦ ᓱᒃᑯᑎᑦᓯᑌᓕᓂᓕᕆᕕᒻᒧᑦ, ᐱᒍᓐᓇᐅᑎᓖᑦ ᑎᑭᑦᑎᓗᒋᑦ ᐅᑭᐅᕐᑕᑐᒧᑦ ᐃᓕᓐᓂᐊᑎᑦᓯᒋᐊᕐᑐᓱᑎᒃ ᐱᓪᓗᑯᒋᐊᓕᓐᓂᒃ ᐱᓇᓱᐊᕐᑕᐅᒋᐊᓕᓐᓂᒃ ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᐅᑉ ᐱᓇᓱᑦᑎᖏᓐᓄᑦ. ᑖᓂᐊᓪ ᕕᕆᑎᐊᑦ ᐃᓚᒋᔭᐅᔪᖅ ᑌᒃᑯᓄᖓ ᐱᒍᓐᓇᐅᑎᓕᓐᓄᑦ, ᐱᓇᓱᐊᒐᖃᓗᐊᖕᖑᐊᓱᓂ ᓱᓪᓗᓕᓕᕆᓂᕐᒥᒃ ᐊᒻᒪᓗ ᐅᕐᖂᓯᓴᐅᑎᓂᒃ. “ᑖᓂ ᕙᕆᑎᐊᑦ ᐱᓇᓱᖃᑎᑦᓯᐊᖅ,” ᕕᓕᑉ ᐅᖃᕐᑐᖅ, “ᐃᓄᓐᓂᒃ ᐃᓕᓐᓂᐊᑎᑦᓯᓯᐊᓲᖅ ᐊᒻᒪᓗ ᑕᑯᑎᑦᓱᒋᑦ ᖃᓄᖅ ᐱᓇᓱᒋᐊᖃᕆᐊᖏᑦ ᓱᒃᑯᑎᑦᓯᑌᓕᓗᑎᓪᓗ ᐅᕐᖂᓯᓴᐅᑎᓂᒃ. ᑰᑦᔪᐊᒥ, ᐱᓇᓱᑦᑎᖃᓕᕇᕐᑐᒍᑦ ᐱᖓᓱᓂᒃ ᓱᒃᑯᑎᑦᓯᑌᓕᓂᕐᒧᑦ ᓴᓇᒋᐊᓪᓛᔨᕈᕐᑎᑕᐅᒪᔪᓂᒃ ᐅᕐᖂᓯᓴᐅᑎᓄᑦ.”

ᕿᔪᓕᕆᒋᐅᕐᓴᓂᖅ ᐊᑑᑎᔭᐅᓯᒪᓕᕐᒥᔪᖅ ᓴᓇᒋᐊᓪᓛᕆᔨᑦᑎᓄᑦ ᐃᑲᔪᕐᑎᒌᑎᒍᑦ ᓴᓇᔩᒃᑯᑎᒍᓪᓗ ᑕᒃᑲᓂ ᐅᐱᕐᖔᒥ ᐊᒻᒪᓗ ᑲᔪᓯᓛᕐᓱᓂ ᐅᑭᐊᒥ.

ᐱᓕᑉ ᐴᓭ ᑐᑭᓯᓇᕐᑎᓯᔪᖅ “ᐱᓇᓱᐊᕐᓂᓴᐅᒍᑦᑕ ᐱᒋᐅᕐᓴᑎᑦᓯᓂᕐᒥᒃ, ᐋᕐᕿᒋᐊᕆᐊᓕᓐᓂᒃ ᐱᓇᓱᐊᖕᖏᓂᕐᓴᐅᓚᖓᒋᐊᑦᑕ, ᐊᒻᒪᓗ ᑕᒪᓐᓇ ᑐᑭᖃᕐᓱᓂ ᑲᔪᓯᑦᓯᐊᓂᕐᓴᒥᒃ ᐊᒻᒪᓗ ᐊᑯᓃᕐᓂᓴᒥᒃ ᓱᒃᑯᑎᑦᓯᑌᓕᓂᕐᒥᒃ ᐊᓂᕐᕋᑎᓐᓂᒃ.” ᖃᓄᕐᑑᕈᑎ ᐱᔭᕆᐊᑭᑦᑐᖅ: ᐱᒋᐅᕐᓴᑎᑦᓯᓂᖅ “ᐱᓇᓱᑦᑎᕗᑦ ᐱᒍᓐᓇᓯᓪᓚᕆᖁᓗᒋᑦ ᐱᒍᓐᓇᕆᐊᓕᓕᒫᒥᓂᒃ.”

ᑕᒃᑲᓂ ᐊᕐᕌᒍᒥ, ᐊᒻᒪᓗ ᓯᕗᓂᑦᑎᓂ, ᑐᕌᒐᖃᕐᑐᒍᑦ ᑕᑕᑦᑎᓯᓂᕐᒥᒃ ᐱᓇᓱᑦᑎᑎᓐᓂᒃ ᐅᐱᒍᓱᓐᓂᒥᒃ ᑕᒪᖏᓐᓂ ᐃᒻᒥᓂᒃ ᐊᒻᒪᓗ ᐱᓇᓱᑦᑕᒥᓂᒃ. ᐱᒋᐅᕐᓴᑎᑦᓯᓂᓪᓚᕆᑎᒍᑦ, ᐃᓂᓕᐅᕈᓐᓇᑐᒍᑦ ᐃᓄᐃᑦ ᐱᕈᕐᐸᓕᐊᕕᒋᒍᓐᓇᑕᖓᓂᒃ ᓇᒻᒥᓂᖅ ᐱᔪᒪᔭᖏᓐᓄᑦ.