ᐊᕐᕌᒍᓂᒃ ᐊᒥᓱᒐᓚᐅᓕᕐᑐᓂᒃ, ᐊᔪᐃᓐᓇᕆᐊᓪᓛᓯᒪᔪᒍᑦ ᖃᐅᔨᔭᐅᑎᑦᓯᒐᓱᑦᓱᑕ ᐃᓪᓗᓂᒃ ᐊᑦᑕᑐᕐᑐᓄᑦ  ᐱᒻᒪᕆᐅᓂᖓᓂᒃ ᑐᓂᔨᓂᐅᑉ ᑮᓇᐅᑦᔭᓵᒥᓂᒃ ᓇᓗᓀᕐᓯᒍᑎᓂᒃ ᐃᓪᓗᒥᒃ ᐊᑦᑕᑑᑎᖏᑦᑕ ᐊᑭᑭᓪᓕᒋᐊᕈᑎᖏᑦ ᓄᑕᐅᓯᓕᕐᑕᐅᖁᑦᓱᒋᑦ.

ᔫᓂ 30-ᒥ, ᐃᓪᓗᒥᒃ ᐊᑦᑕᑑᑏᑦ ᐊᑭᑭᓪᓕᒋᐊᕈᑎᖓ ᐃᓱᓕᓲᖅ ᐊᕐᕌᒎᓚᐅᕐᑐᒥᑦ. ᐱᒋᐊᕐᓱᓂ ᔪᓓ 1-ᒥ, ᓄᑖᑦ ᐃᓪᓗᒥᒃ ᐊᑦᑕᑑᑏᑦ ᐊᑭᖏᑦ ᐊᑐᓯᓛᕐᑐᑦ, ᐃᓚᖃᕐᓗᑎᒃ ᐊᑭᑐᓂᕐᐹᓂᒃ ᐃᓪᓗᒥᒃ ᐊᑦᑕᑑᑏᑦ ᐊᑭᖏᓐᓂᒃ. ᐃᓪᓗᒥᒃ ᐊᑦᑕᑐᕐᑐᑦ ᐊᑭᑐᓂᕐᐹᖓᓂᒃ ᐊᑭᓕᕐᑐᐃᑎᑦᑌᓕᓗᒋᑦ, ᐱᒻᒪᕆᐅᕗᖅ ᐃᓪᓗᓕᕆᔨᒃᑯᑦ ᐊᓪᓚᕕᖓᓅᕆᑉᐸᑕ ᓇᓗᓀᕐᓯᔪᓂᒃ ᑮᓇᐅᑦᔭᓵᖏᓐᓂᒃ ᐃᓪᓗᒥᒃ ᐊᑦᑕᑑᑎᖏᑦ ᐋᕐᕿᒋᐊᕐᑕᐅᓚᖓᒻᒪᑕ ᒪᓕᓪᓗᒋᑦ ᑮᓇᐅᑦᔭᓵᖏᑦ. ᑐᕌᒐᕗᑦ ᐱᒍᓐᓇᑎᑦᓯᓂᖅ ᐃᓘᓐᓇᓕᒫᖏᓐᓂᒃ ᐃᓪᓗᒥᒃ ᐊᑦᑕᑐᕐᑐᓂᒃ ᐃᑲᔪᕐᓯᔭᐅᓂᕐᒥᒃ ᐃᓪᓗᒥᒃ ᐊᑦᑕᑑᑎᓄᑦ ᐊᑭᑭᓪᓕᒋᐊᕈᑎᒧᑦ ᐊᑭᓕᕐᑐᐃᓗᑎᓪᓗ ᓈᒻᒪᓂᕐᐹᒥᒃ.

ᑎᒥᐅᔫᑉ ᐃᓗᐊᓂ, ᐱᓇᓱᑦᑎᕗᑦ ᐱᓇᓱᐊᒻᒪᕆᑦᑐᑦ ᓄᑕᐅᓯᓖᒐᓱᑦᓱᑎᒃ ᐃᓪᓗᒥᒃ ᐊᑦᑕᑐᕐᑐᑦ ᐊᓪᓚᖁᑎᖏᓐᓂᒃ. ᐱᒻᒪᕆᐅᕗᖅ ᖃᐅᔨᒪᓗᓂ ᖃᖓᓕᒫᖅ ᑭᖑᕃᓚᖓᖕᖏᓇᑦᓯ ᑐᓂᔨᓂᕐᒧᑦ ᓇᓗᓀᕐᓯᒍᑎᓂᒃ ᑮᓇᐅᑦᔭᓵᓯᓐᓂᒃ, ᓄᑕᐅᓯᓕᕈᓐᓇᕋᑦᑎᒋ ᐊᓪᓚᖁᑎᖏᑦ ᔪᓓ 1-ᒨᓕᖓᓕᕐᑎᓗᒋᑦ.

---

ᐊᑐᕐᑕᐅᒍᓐᓇᑐᑦ ᓇᓗᓀᕐᓯᒍᑏᑦ ᑮᓇᐅᑦᔭᓵᓂᒃ ᐊᑭᑭᓪᓕᒋᐊᕈᑎᒥᒃ ᑐᑭᑖᕋᓱᐊᕐᓂᒧᑦ ᐅᑯᐊ: ᑯᐯᒃᑯᓂ ᑕᒃᓯᑎᑦ ᖃᓄᐃᓕᖓᓐᓂᒪᖔᑕ ᖃᐅᔨᑎᑦᓯᒍᑎ, T4 ᓯᑯᑦᓴᔭᖏᑦ, ᐃᑦᑑᒍᑎᑖᕈᑎᑦ ᓯᑯᑦᓴᔭᖏᑦ, ᓂᕿᑖᕈᑎᑖᕈᑏᑦ ᓯᑯᑦᓴᔭᖏᑦ.

---

 

ᑖᓐᓇ ᐱᒋᐊᕐᑎᑕᐅᒪᔪᖅ ᐃᓚᒋᔭᐅᑦᓱᓂ "ᐃᓪᓗᒥᒃ ᐊᑦᑕᑑᑎᑎᓐᓂᒃ ᐊᑭᓕᕐᑐᐃᒋᑦ"-ᒧᑦ ᖃᐅᔨᒪᔭᐅᑎᑦᓯᒐᓱᐊᕐᓂᒧᑦ, ᐃᓚᓕᒻᒧᑦ ᐊᑦᔨᒌᖕᖏᑐᓂᒃ ᓴᓇᕐᕈᑎᓂᒃ ᐱᓂᐊᕐᓂᓂᓪᓗ:

• ᐊᑭᓐᓇᒥᐅᑌᑦ ᐊᑭᑭᓪᓕᒋᐊᕈᑎᐅᑉ ᒥᑦᓵᓅᓕᖓᔪᑦ ᒪᑭᕝᕕᐅᑉ ᑖᒃᓯᓕᕆᔨᖏᑦᑕ ᐊᓪᓚᕕᖏᑦᑕ ᐅᒃᑯᐊᖏᓐᓃᑐᑦ.
• ᐃᓪᓗᒥᒃ ᐊᑦᑕᑐᕐᓂᒨᓕᖓᔪᓂᒃ ᖃᐅᔨᒪᔭᐅᒋᐊᓕᓐᓂᒃ ᐊᓪᓚᓯᒪᔪᕐᑕᓖᑦ ᐊᓪᓚᓂᐊᒑᐲᑦ ᐊᒻᒪᓗ ᐊᑭᓐᓇᒥᐅᑌᑦ.
• ᑐᓴᐅᑎᒃᑯᑦ ᑐᓴᕋᑦᓭᑦ ᑐᓴᕐᓴᐅᑎᑕᐅᓂᖏᑦ ᐃᓪᓗᓕᕆᔨᒃᑯᓂ ᐱᓇᓱᑦᑎᑎᓐᓄᑦ ᓄᓇᓕᓐᓂ ᐊᑐᓂᑦ.
• ᐊᓪᓚᑖᕐᑎᓯᓃᑦ ᓄᓇᓕᐅᑉ ᓯᕗᓕᕐᑎᖏᓐᓂᒃ ᓴᐳᑦᔭᐅᒍᒪᐅᑎᓂᒃ ᐊᑭᑭᓪᓕᒋᐊᕈᑎᑖᕐᑎᓯᒐᓱᐊᕐᓂᒥᒃ.
• ᐊᒥᓱᑦ ᐊᔭᐅᕆᒋᐊᕈᑏᑦ ᐊᓪᓚᓯᒪᔪᑦ ᖃᕆᑕᐅᔭᒃᑯᑦ.
• ᐊᕐᕕᑕᕐᓂᖅ ᓄᓇᕕᓕᒫᒧᑦ ᐃᓚᐅᑎᓪᓗᒍ ᐃᓚᖓᑦ ᐱᒍᑦᔨᓂᓕᕆᕕᒻᒥ ᐱᓇᓱᑦᑎᕗᑦ ᕿᓂᕐᓱᑕ ᐋᕐᕿᒍᑎᑦᓴᓂᒃ ᐊᑭᓕᑦᓴᖏᑦ ᐱᑦᔪᑎᒋᓗᒋᑦ ᐱᓇᓱᐊᖃᑎᒋᑦᓱᒋᑦ ᐃᓪᓗᒥᒃ ᐊᑦᑕᑐᕐᑐᑦ.

ᐃᕐᙯᑎᑦᓯᒍᒪᕗᒍᑦ ᐃᓪᓗᒥᒃ ᐊᑦᑕᑐᕐᑐᓂᒃ ᐱᓀᓗᑕᖃᑲᓪᓚᐸᑦ ᐊᑭᓖᒍᑎᓂᒃ, ᐱᒻᒪᕆᐅᒻᒪᑦ ᐅᖄᓚᒋᐊᒥᒃ ᐅᕙᑦᑎᓄᑦ ᕿᓂᕈᓐᓇᕋᑦᑕ ᓈᒻᒪᓈᕐᑐᒥᒃ ᐋᕐᕿᒍᑎᑦᓴᒥᒃ ᑲᑐᑦᔨᓗᑕ.

ᑖᓐᓇ ᐊᔪᐃᓐᓇᓂᐅᑦᓱᓂ ᐊᑭᑭᓪᓕᒋᐊᕐᑎᓯᒐᓱᐊᕐᓂᖅ ᐊᔪᐃᓐᓇᐅᑎᐅᒋᐊᓪᓚᐅᑎᓛᕐᑐᖅ ᐱᓇᓱᐊᕈᓯᕐᓂ ᙯᔪᓂ.