ᓯᕗᓪᓕᐹᑦ ᐊᐱᕐᓲᑏᑦ ᐃᓪᓘᑉ ᐃᓗᐊᓂ - ᑭᐅᒍᑎᕕᓃᑦ ᓄᐃᑕᐅᔪᑦ: ᐃᓪᓗᒥᒃ ᐊᑦᑕᑐᕐᑐᑦ ᓯᕗᓪᓕᐸᐅᑦᔭᐅᖁᓂᕐᐹᖏᑦ ᐃᓅᕕᑦᓴᓯᐊᓄᑦ ᐃᓂᓄᑦ 

ᓄᑖᒥ ᐊᔪᐃᓐᓇᓂᕐᒥ ᐱᐅᓯᒋᐊᕆᒐᓱᓐᓂᒧᑦ ᐃᓪᓗᐃᑦ ᖃᓄᐃᓐᓂᖏᓐᓂᒃ ᐊᒻᒪᓗ ᐱᐅᓯᒋᐊᕐᓗᒋᑦ ᐃᓅᓯᖏᑦ ᓄᓇᕕᒻᒥᐅᑦ, ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᒃ (KMHB) ᐱᒋᐊᕋᑖᓚᐅᔪᖅ ᓄᑖᒥᒃ ᐱᓇᓱᐊᕐᓂᒥᓂᒃ "ᖃᓄᐃᖕᖏᓯᐊᕐᓂᖅ ᐊᓂᕐᕋᒥ", ᓄᐃᑦᓯᐊᑎᑦᓯᓱᓂ ᐱᓇᓱᐊᖃᑎᖃᕐᓂᓯᐊᕌᓗᒻᒥᓂᒃ ᒪᑭᕝᕕᑯᓐᓂᒃ. ᐱᓇᓱᐊᕐᓗᓂ ᐃᓪᓗᒥᒃ ᐊᑦᑕᑐᕐᑐᓂᒃ ᐃᓚᐅᑎᑦᓯᓂᕐᒥᒃ ᐊᒻᒪᓗ ᓄᓇᓕᐅᑉ ᐃᓱᒪᒋᔭᖏᓐᓂᒃ ᖃᐅᔨᒐᓱᓐᓂᒥᒃ, ᑖᓐᓇ ᐱᓇᓱᐊᕐᓂᖅ ᕿᓂᕐᑐᖅ ᐃᓚᐅᑎᑦᓯᓂᕐᒥᒃ ᐃᓪᓗᒥᒃ ᐊᑦᑕᑐᕐᑐᓂᒃ ᐋᕐᕿᓱᐃᓂᕐᒥ ᓯᕗᓂᖓᓂᒃ ᐃᓪᓗᖃᕐᓂᐅᑉ ᓄᓇᕕᒻᒥ. ᓯᕗᓪᓕᐹᑦ ᐊᐱᕐᓲᑏᑦ, ᑐᕌᕐᑕᓖᑦ ᑲᑎᕐᓱᐃᓂᕐᒥᒃ ᐃᓪᓗᒥᒃ ᐊᑦᑕᑐᕐᑐᑦ ᐃᓱᒪᒋᔭᖏᓐᓂᒃ ᐊᒻᒪᓗ ᐱᒍᒪᔭᖏᓐᓂᒃ, ᐱᔭᕇᕐᓯᒪᓕᕐᑐᑦ, ᐊᒻᒪᓗ ᑭᐅᒍᑎᕕᓃᑦ ᐊᑐᐃᓐᓇᐅᓕᕐᓱᑎᒃ, ᐊᕐᖁᓯᐅᕐᑐᑦ ᐊᓯᑦᔨᓂᕐᓂᒃ.

100 ᐅᖓᑖᓃᑦᑐᑦ ᐃᓚᐅᖃᑕᐅᔪᑦ ᐃᑲᔪᕈᒪᑦᓯᐊᓱᑎᒃ ᐃᑲᔪᕐᓯᓚᐅᕐᑐᑦ ᑭᐅᒪᓂᒃᑯᑦ ᐊᐱᕐᓲᑎᓂᒃ, ᐅᖃᐅᓯᖃᕐᓱᑎᒃ ᐱᔪᒪᔭᒥᓂᒃ ᐱᐅᓯᒋᐊᕐᓯᒪᔪᓂᒃ ᐃᓅᕕᐅᔪᓂᒃ ᐃᓂᓂᒃ. ᖃᐅᔨᒍᑎᐅᔪᑦ ᐱᔭᐅᓯᒪᔪᑦ ᐊᐱᕐᓱᓂᒃᑯᑦ ᖃᐅᔨᓴᕐᓂᒥᑦ ᓇᓗᓀᕐᓯᓯᒪᔪᑦ ᐱᒻᒪᕆᐅᓂᖏᓐᓂᒃ ᐱᐅᓯᒋᐊᕆᐊᓖᑦ ᐊᒻᒪᓗ ᓄᐃᑦᓯᓱᓂ ᐱᒍᒪᔭᖏᓐᓂᒃ ᓄᓇᕕᒻᒥᐅᑦ.

ᐱᒻᒪᕆᐅᓂᖏᑦ ᓯᕗᓪᓕᐹᑦ ᐊᐱᕐᓲᑏᑦ:

1. ᖃᕆᐊᑦ ᐊᖏᓂᖓ: 60%-ᓗᑐᐊᓗᐃᑦ ᐃᓚᐅᖃᑕᐅᔪᑦ ᐱᒍᒪᔪᑦ ᐊᖏᓂᕐᓴᓂᒃ ᖃᕆᐊᕐᓂᒃ, ᐱᓗᐊᕐᑐᒥᒃ ᑭᖕᖒᒪᑦᓯᓱᑎᒃ ᐅᓚᐱᑕᐅᓇᖕᖏᑐᓂᒃ ᐃᓂᓂᒃ ᐃᓱᕐᕆᓇᕐᑐᓂᒃ ᑕᙯᕐᓯᓇᕐᓱᑎᓪᓗ.

2. ᐃᑎᕐᑕᐅᒍᓐᓇᑐᑦ ᐊᓐᓄᕌᖃᐅᑏᑦ: 54%-ᖏᑦ ᑭᐅᔪᑦ ᐅᖃᕐᑐᕕᓃᑦ ᐱᒍᒪᓂᕐᒥᓂᒃ ᐃᑎᕐᑕᐅᒍᓐᓇᑐᓂᒃ ᐊᓐᓄᕌᖃᐅᑎᓂᒃ, ᐃᓪᓘᑉ ᐃᓚᖓ ᐃᓂᓪᓚᖓᑦᓯᐊᓂᕐᓴᐅᑎᑦᓯᒍᓐᓇᑐᖅ ᐊᒻᒪᓗ ᓴᓂᕐᕓᒪᕕᖃᑦᓯᐊᓂᕐᓴᐅᓗᓂ.

3. ᐊᓇᕐᕕᓂᒃ ᓄᑕᐅᓯᓖᓃᑦ: ᐃᑎᓂᕐᓴᖅ ᐃᓘᓐᓇᓂᐊᕐᕕᒃ ᐱᒍᒪᔭᐅᓗᐊᖕᖑᐊᖃᑦᑕᓚᐅᕐᑐᖅ, ᐅᖃᐅᓯᐅᑦᓱᓂ 55%-ᖏᓐᓄᑦ ᐃᓚᐅᖃᑕᐅᔪᑦ.

4. ᐃᒐᓕᕐᓂᒃ ᐱᐅᓯᒋᐊᕆᓃᑦ: ᐃᒐᓕᕐᒥ, 64% ᐱᒍᒪᓂᕐᓴᐅᓚᐅᕐᑐᑦ ᒪᕐᕉᓂᒃ ᒪᕐᕋᓕᕆᕖᓐᓂᒃ, ᐊᒻᒪᓗ 50% ᐱᒍᒪᑦᓱᑎᒃ ᓅᑦᑕᕈᓐᓇᑐᒥᒃ ᓵᕐᒥᒃ, ᐃᓱᐊᕐᓂᓴᐅᒐᔭᕐᑐᒥᒃ ᐊᒻᒪᓗ ᐊᓯᑦᔨᒋᐊᕐᑎᓯᒍᓐᓇᓗᓂ ᐃᒐᓕᕐᒥᒃ.

5. ᐊᖏᓂᕐᓴᖅ ᐳᓛᕐᕕᒃ: 66%-ᖏᑦ ᑭᐅᔪᑦ ᑕᑯᓐᓇᖑᐊᓚᐅᕐᑐᑦ ᐊᖏᓂᕐᓴᒥᒃ ᐳᓛᕐᕕᒥᒃ, ᐊᓯᑦᔨᑕᕈᓐᓇᑐᒥᒃ ᐃᓘᓐᓇᖏᓐᓄᑦ ᐊᑐᕐᑕᐅᒍᓐᓇᑐᒥᒃ ᐃᓂᒥᒃ ᑲᑎᕝᕕᐅᓗᓂ ᐊᒻᒪᓗ ᐃᓚᒌᓄᑦ ᓱᖃᑦᓯᕕᐅᓗᓂ.

6. ᐊᖏᔪᖅ ᑐᕐᓲᖅ ᐊᓕᐊᓇᕐᑐᓂᒃ ᓱᖃᑦᓯᓂᕐᓄᑦ: 77%-ᓗᑐᐊᓗᖏᑦ ᐃᓚᐅᖃᑕᐅᔪᑦ ᓲᕐᓗ ᓯᓐᓇᑑᒪᒋᔭᖃᓚᐅᕐᑐᑦ ᐱᒍᒪᑦᓱᑎᒃ ᐊᖏᓂᕐᓴᒥᒃ ᑐᕐᓲᒥᒃ ᐊᑐᕈᓐᓇᑕᒥᓂᒃ ᐊᒥᓱᐃᓄᑦ ᐱᑦᔪᑎᓄᑦ ᐆᑦᑑᑎᒋᓗᒍ ᓴᓂᕐᕓᒪᓂᖅ ᒪᙯᒍᑎᓂᒃ, ᐊᓃᕈᑎᓂᒃ ᐊᓐᓄᕌᓂᒃ, ᐊᒻᒪᓗ ᓴᓂᕐᕓᒪᕕᐅᓗᓂ.

7. ᑖᕐᓯᒋᐊᕈᓐᓇᑐᑦ ᐃᑯᒣᑦ: 86%-ᖏᑦ ᑭᐅᔪᑦ ᐅᖃᓚᐅᕐᑐᑦ ᐱᒍᒪᓂᕐᒥᓂᒃ ᑖᕐᓯᒋᐊᕈᓐᓇᑐᓂᒃ ᐃᑯᒪᓂᒃ, ᐃᓱᐊᕆᔭᒥᓂᒃ ᐃᓂᓕᐅᕈᓐᓇᓯᑎᑦᓯᔪᓂᒃ ᒪᓕᓪᓗᒋᑦ ᐃᓱᒪᖏᑦ ᐊᒻᒪᓗ ᑭᖕᖒᒪᒋᔭᖏᑦ. ᐱᒍᒪᓂᕐᓴᐅᓱᑎᓪᓗ ᖃᑯᕐᑕᓂᒃ ᐃᑯᒪᓂᒃ ᖁᕐᓱᑕᐅᖕᖏᖔᕐᓗᑎᒃ ᐅᕝᕙᓘᓐᓃᑦ ᑐᖑᔪᕐᑕᐅᖏᖔᕐᓗᑎᒃ.

8. ᕿᔪᐃᑦ ᓇᑏᑦ: 81%-ᖏᑦ ᐃᓚᐅᖃᑕᐅᔪᑦ ᐱᒍᒪᓂᕐᓴᐅᓚᐅᕐᑐᑦ ᕿᔪᓐᓂᒃ ᓇᑎᕐᓂᒃ, ᑕᑯᒥᓇᕐᓂᓴᐅᒻᒪᑕ ᐊᒻᒪᓗ ᓄᑖᖑᓂᕐᓴᐅᓱᑎᒃ ᓇᑎᑦᓴᔭᑐᖃᕐᓂᒃ.

9. ᓯᓚᑖᓂᑦ ᐱᔪᒥᒃ ᓱᕐᕙᓛᖕᖏᓂᕐᓴᖅ: ᐊᒥᓱᒻᒪᕇᑦ 77%-ᖏᑦ ᑭᐅᔪᑦ ᓯᕗᓪᓕᐅᔭᐅᖁᔨᓚᐅᕐᑐᑦ ᓯᓚᑖᓂᑦ ᐱᔪᒥᒃ ᓱᕐᕙᓛᖕᖏᓂᕐᓴᐅᖁᔨᓂᕐᒥᒃ, ᐃᓕᑕᕐᓯᓱᑎᒃ ᐱᒻᒪᕆᐅᓂᖓᓂᒃ ᓂᐯᑦᑐᓯᐊᒦᓐᓂᐅᑉ ᐊᒻᒪᓗ ᐅᓚᐱᑕᐅᖕᖏᓂᐅᑉ ᐊᓂᕐᕋᒥ ᐃᓗᐊᓂ.

 

ᐊᐱᕐᓲᑎᐅᓛᓕᕐᒥᔪᑦ ᓄᐃᑲᓵᓕᕐᑐᑦ

ᑲᔪᓯᑦᓯᐊᓚᐅᕐᑎᓗᒋᑦ ᐊᐱᕐᓲᑏᑦ ᓯᕗᓪᓕᐹᑦ, ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᒧᑦ ᐊᓪᓚᕕᒻᒪᕆᒃ ᐊᓕᐊᓱᒻᒪᕆᒃᑯᑦ ᖃᐅᔨᔭᐅᑎᑦᓯᒋᐊᒥᒃ ᐊᐱᕐᓲᑎᐅᓛᓕᕐᒥᔪᑦ ᐊᑐᐃᓐᓇᐅᓴᐅᑎᒋᓛᓕᕆᐊᖏᑦ. ᐃᓘᓐᓇᑎᒃ ᐃᓪᓗᒥᒃ ᐊᑦᑕᑐᕐᑐᑦ ᑫᓪᓗᑐᕐᑕᐅᕗᑦ ᐃᓚᐅᖃᑕᐅᖁᔭᐅᑦᓱᑎᒃ, ᑖᓐᓇ ᑲᑐᑦᔨᓂᒃᑯᑦ ᐊᔪᐃᓐᓇᓂᖅ ᐃᑲᔪᕐᓯᒪᕆᓛᕐᒪᑦ ᐋᕐᕿᓱᐃᓂᕐᒥᒃ ᓯᕗᓂᕐᒥ ᓄᓇᕕᐅᑉ ᐃᓪᓗᓴᖏᓐᓂᒃ ᐊᒻᒪᓗ ᐱᐅᓯᒋᐊᕆᓗᓂ ᐱᐅᓂᖓᓂᒃ ᐃᓅᓯᐅᑉ ᓄᓇᖃᕐᑐᓄᑦ.

ᓴᐳᑦᔨᓯᐊᕐᓂᖅ "ᖃᓄᐃᖕᖏᓯᐊᕐᓂᖅ ᐊᓂᕐᕋᒥ" ᐱᓇᓱᐊᕐᓂᒥᒃ ᐱᕕᑦᓴᓯᐊᒻᒪᕆᐊᓗᒃ ᐃᓄᓐᓄᑦ ᑐᓴᕐᑕᐅᑎᑦᓯᓂᕐᒥᒃ ᐃᓱᒪᒋᔭᒥᓂᒃ, ᐱᒍᒪᔭᒥᓂᒃ, ᐊᒻᒪᓗ ᐱᒋᐊᓕᒻᒥᓂᒃ, ᑌᒫᒃ ᐊᕐᖁᓯᐅᕆᑦᓱᑎᒃ ᕿᑦᑌᖓᓇᕐᓂᓴᓄᑦ, ᐃᓱᕐᕆᓇᕐᓂᓴᓄᑦ, ᐊᒻᒪᓗ ᑲᔪᓯᑎᑕᐅᒍᓐᓇᓂᕐᓴᓄᑦ ᐃᓅᕕᒋᔭᐅᔪᓄᑦ.

ᑌᒣᒻᒪᑦ, ᕿᓂᖃᑦᑕᓚᖓᕗᑎᑦ ᐊᐱᕐᓲᑎᐅᓛᓕᕐᒥᔪᑦ ᐊᑐᐃᓐᓇᕈᕐᑕᐅᓂᖏᓐᓂᒃ, ᐊᒻᒪᓗ ᑎᒍᓯᓗᑎᑦ ᐱᕕᑦᓴᑖᕐᓂᒥᒃ ᐊᖏᔪᒥᒃ ᓱᕐᕃᓂᕐᒥᒃ ᓄᓇᕕᐅᑉ ᐃᓪᓗᖃᕐᓂᖓᑕ ᑕᑯᑦᓴᐅᓂᖓᓂᒃ. ᑲᑐᑦᔨᓗᑕ, ᓴᓇᓚᐅᕐᑕ ᖃᐅᒪᓂᕐᓴᒥᒃ ᐱᕈᕐᐸᓕᐊᑦᓯᐊᑐᒥᒃ ᓯᕗᓂᑦᓴᒥᒃ ᓄᓇᕕᒻᒥᐅᓕᒫᓄᑦ!

ᑐᓴᐅᒣᓐᓇᕋᓱᒋᑦ ᑐᓴᕐᑎᓯᒍᑎᒋᐊᓪᓚᓂᒃ ᐱᑦᔪᑎᒋᓗᒍ "ᖃᓄᐃᖕᖏᓯᐊᕐᓂᖅ ᐊᓂᕐᕋᒥ" ᐱᓇᓱᐊᕐᓂᖅ ᐊᒻᒪᓗ ᐊᓯᑦᔩᕙᓪᓕᐊᓂᖓ.

 

 

 

819 964-2000

Toll Free: 1-833-229-2008

Kativik Municipal Housing
Bureau

 P.O.Box 1200,
Kuujjuaq, Quebec
J0M 1C0