ᑐᓴᕋᑦᓴᖅ |  ᐃᓪᓗᓕᕆᔨᒃᑯᑦ ᐊᓪᓚᕕᖓ ᓄᓇᕕᒻᒥ ᐸᕐᓇᑐᖅ $105 ᒥᓕᐊᓐ ᑖᓚᓂᒃ ᑮᓇᐅᔭᑎᒍᑦ ᑐᕌᒐᕐᓂᒃ ᐊᒥᓱᒐᓚᓐᓄᑦ ᓄᑕᐅᓯᓕᕐᑎᕆᓂᕐᓄᑦ ᐃᓪᓗᓂᒃ ᐊᑦᑕᑐᕐᑎᓯᓂᕐᒥᓄᑦ.

ᑐᓴᕋᑦᓴᖅ
ᑕᒉᓐᓇᓭᓐᓇᖅ ᑐᓴᕐᑎᓯᐅᑎᐅᒋᐊᓕᒃ

 

ᑰᑦᔪᐊᖅ, ᑯᐯᒃ (ᐁᕆᓕ 25, 2024) – ᐃᓪᓗᓕᕆᔨᒃᑯᑦ ᐊᓪᓚᕕᖓ, ᑎᓕᔭᐅᒪᐅᑎᖓ ᐱᒍᑦᔨᓂᖅ 14-ᓂᒃ ᐃᓄᑐᐃᓐᓀᑦ ᓄᓇᓕᖏᓐᓂᒃ ᑎᒍᓯᓂᒃᑯᑦ, ᐊᐅᓚᑦᓯᓂᒃᑯᑦ ᐊᒻᒪᓗ ᓱᒃᑯᑎᑦᓯᑌᓕᓂᒃᑯᑦ ᐃᓄᐃᑦ ᐃᓪᓗᖏᓐᓂᒃ ᐃᓪᓗᔪᐊᓂᒃ ᐊᑐᐃᓐᓇᐅᑎᑕᐅᔪᓂᒃ ᐃᓄᑑᓈᕐᑎᑐᓄᑦ ᐃᓚᒌᓄᓪᓗ, ᓇᓗᓀᕐᓯᕗᖅ ᐸᕐᓇᓂᕐᒥᓂᒃ ᐅᓄᕐᑐᒪᕆᒻᒥᒃ ᑮᓇᐅᔭᑎᒍᑦ ᑐᕌᒐᕐᒥᒃ ᑯᐯᒃ ᐃᓪᓗᓕᕆᔨᕐᔪᐊᑯᖏᓐᓂᑦ ᐱᓯᒪᔪᒥᒃ $105 ᒥᓕᐊᓐ ᑖᓚᓂᒃ ᓄᑕᐅᓯᓕᕐᑎᕆᓂᒻᒪᕆᓐᓄᑦ ᐊᒻᒪᓗ ᒥᑭᓂᕐᓴᓄᑦ ᓄᑕᐅᓯᓕᕐᑎᕆᓂᕐᓄᑦ ᐊᒥᓲᓂᕐᓴᓂᒃ 140-ᓂᒃ ᐃᓪᓗᓂᒃ ᓄᓇᕕᓕᒫᒥ.

ᑐᑦᓯᕋᕐᓂᖅ ᑖᑦᓱᒥᖓ ᑮᓇᐅᔭᑎᒍᑦ ᑐᕌᒐᕐᒥᒃ ᐱᒍᓐᓇᑎᑕᐅᓯᒪᔪᖅ ᓇᑯᕐᒪᑕ ᐃᑲᔪᕐᓯᓂᖏᑦ ᑲᕙᒪᑐᖃᒃᑯᑦ ᐊᒻᒪᓗ ᑯᐯᒃ ᑲᕙᒪᖓ ᓇᓗᓀᕐᓯᓯᒪᒻᒪᑕ ᐃᓘᓐᓈᒍᑦ ᑮᓇᐅᔭᖃᕐᑎᓯᒍᑎᑦᓴᓂᒃ ᐊᕐᕌᒍᖏᓐᓄᑦ 2022-ᒥᑦ 2028-ᒧᑦ $3.2 ᐱᓕᐊᓐ ᑖᓚᓂᒃ ᐃᓪᓗᓕᐅᕐᓂᒧᑦ ᐱᓇᓱᐊᕐᓂᓄᑦ ᑯᐯᒃ ᓄᓇᖓᓂ. “ᑖᓐᓇ ᐱᒻᒪᕆᒃ ᐅᓄᕐᓂᖅ ᓄᐃᑕᑎᑦᓯᔪᖅ ᓇᓗᓇᖕᖏᑐᒥᒃ ᐱᒍᓐᓇᓚᕆᓐᓂᖓᓂᒃ ᐃᓪᓗᓕᕆᔨᒃᑯᑦ ᐊᓪᓚᕕᖓ ᓄᓇᕕᒻᒥ ᐊᐅᓚᑦᓯᓂᕐᒥᒃ ᐸᕐᓇᓂᕐᒥᒃ ᑭᖕᖒᒪᒋᔭᐅᔪᓄᑦ ᐊᒻᒪᓗ ᐱᓇᓱᐊᕐᓂᖏᓐᓄᑦ ᐃᓪᓗᓕᕆᓂᖓᑕ ᐊᒻᒪᓗ ᒪᓕᑦᓯᐊᓂᖓᓂᒃ ᐱᔭᕆᒐᓱᑦᑕᒥᓂᒃ ᐊᒻᒪᓗ ᑐᓂᒪᓂᖓᑕ ᑲᑎᖕᖓᔨᖏᑦᑕ ᑲᒪᑦᓯᐊᕈᓐᓇᕕᓕᒫᒥᓄᑦ ᑲᒪᑦᓯᐊᕋᓱᑦᓱᑎᒃ ᐃᓄᖏᓐᓂᒃ ᓄᓇᖓᓂᓪᓗ ᓄᓇᕕᐅᑉ,” ᐅᖃᕐᑐᖅ ᓗᐱᓐ ᑌᓅᓪ, ᑐᑭᒧᐊᑦᑎᓯᔨ ᐃᓪᓗᓂᒃ ᐊᑦᑕᑐᕐᑐᓕᕆᕕᒻᒥ ᐊᒻᒪᓗ ᓄᑕᐅᓯᓕᕐᑎᕆᓂᓕᕆᕕᒻᒥ.

ᐃᓪᓗᓕᕆᔨᒃᑯᑦ ᐊᓪᓚᕕᖓᑕ ᓄᓇᕕᒻᒥ ᐃᒣᑦᑑᕗᖅ

ᐃᓪᓗᓕᕆᔨᒃᑯᑦ ᐊᓪᓚᕕᖓ ᓄᓇᕕᒻᒥ ᖄᖏᕐᓂᑯᓕᐅᕐᑎᐅᖏᑦᑑᓱᓂ ᑎᒥᐅᔪᖅ ᐃᒣᑦᓱᓂ, ᓇᑯᕐᒪᑕ ᐱᓇᓱᐊᖃᑎᒌᓐᓂᖏᑦ ᐱᓇᓱᖃᑎᒌᑦᑐᑦ 250 ᓴᐳᑦᔨᓯᐊᕐᓱᑎᒃ ᐱᓇᓱᑦᑏᑦ (80%-ᖏᑦ ᐃᓄᑐᐃᓐᓇᐅᓱᑎᒃ) 14-ᓂ ᓄᓇᓕᓐᓃᑐᑦ ᐊᓪᓚᕕᓐᓂ, 98%-ᖏᓐᓂᒃ ᐃᓄᑐᐃᓐᓀᑦ ᐃᓪᓗᖃᕐᑎᓯᔪᑦ ᐃᓱᕐᕆᓇᕐᑐᓂᒃ, ᐊᑦᑕᓇᕐᑐᒦᓐᓇᖏᑦᑐᓂᒃ ᐊᒻᒪᓗ ᐊᑭᑐᔫᓪᓗᐊᖏᑦᑐᓂᒃ ᐋᕐᕿᒋᐊᕐᓯᒪᔪᓂᒃ ᑭᖕᖒᒪᒋᔭᖏᓐᓅᓕᖓᓕᕐᑎᓱᒋᑦ ᐊᒻᒪᓗ ᐃᓗᕐᖁᓯᖏᓐᓅᓕᖓᓕᕐᑎᓱᒋᑦ.

 

ᖃᐅᔨᓴᕈᒪᒍᕕᑦ, ᐅᖄᕕᒋᓗᒍ:

ᐸᑦᕆᔅ ᓭᓐ-ᐊᒨᕐ 
ᑐᓴᐅᒪᖃᑎᒌᑦᑎᓯᓂᕐᒥᒃ ᑲᒪᔨᒻᒪᕆᒃ
819 964-2000, ᓃᓂᕐᓗᒍ. 276 

ᒫᑦ ᐴᑎᓕᐊᑦ
ᑐᓴᐅᒪᖃᑎᒌᑦᑎᓯᓂᕐᒥᒃ ᑲᒪᔨ
819 964-2000, ᓃᓂᕐᓗᒍ. 227