ᐃᓪᓗᖅ ᐊᑭᑭᑦᑑᓱᓂ ᐊᑦᑕᑐᐊᕆᔭᐅᑎᑕᐅᒍᓐᓇᑐᖅ ᐅᑯᐊ ᒪᓕᒐᐅᑎᑕᐅᔪᑦ ᐊᕕᑦᑐᓯᒪᓃᑦ ᒪᓕᑦᑎᓗᒋᑦ:

1. ᐃᓪᓗᖅ ᖃᕆᐊᖃᖕᖏᑐᖅ ᐊᑦᑕᑐᐊᕆᔭᐅᒍᓐᓇᑐᖅ ᐃᓄᑐᐊᒧᑦ ᐁᑉᐸᕇᓐᓅᓗᓐᓃᑦ;
2. ᖃᕆᐊᕐᑖᕆᐊᓪᓚᒐᔭᕐᑐᑦ ᐃᓗᓯᕐᓘᑎᖃᕐᑐᒥᒃ ᐃᓚᖃᕈᑎᒃ ᐅᕝᕙᓗᓗᓐᓃᑦ ᐃᓗᓯᕐᓘᑎᓕᒻᒥᒃ ᑲᒪᔨᒋᔭᖃᕐᓱᓂ ᖃᕆᐊᖃᕆᐊᖃᕐᑐᒥᒃ;
3. ᖃᕆᐊᕐᑖᕆᐊᓪᓚᒍᓐᓇᑐᑦ ᐊᒥᓱᖕᖑᕈᑎᒃ; ᒪᕐᕉᒃ ᐅᑭᐅᓖᒃ 7 ᐊᑖᓂ ᖃᕆᐊᖃᑎᒌᒍᓐᓇᑑᒃ;
4. ᖃᕆᐊᖃᑎᒌᒍᓐᓇᑑᒃ 7-ᓂᒃ ᐅᑭᐅᓖᒃ ᐊᖑᑏᓐᓈᒃ ᐊᕐᓀᓈᓪᓘᓃᑦ;
5. ᖃᕆᐊᕐᑕᒋᐊᓪᓚᒍᓐᓇᑐᑦ 16-ᓂᒃ ᐅᑭᐅᓖᑦ ᐅᖓᑖᓄᓗᓐᓃᑦ ᐁᑉᐸᖓᓄᓪᓘᓃᑦ;
6. ᕿᑐᕐᖓᕆᔭᐅᔪᖅ ᐊᖓᔪᕐᖄᒥᓐᓂ ᐃᓪᓗᒥᐅᖃᑎᒌᖕᖏᑑᓐᓂ ᐁᖃᑦᑕᓲᖑᒍᓂ ᖃᕆᐊᖃᕈᓐᓇᑐᖅ ᐃᓪᓗᒥᐅᖃᑎᒋᔭᐅᓲᖑᑐᐊᕈᓂ 40%-ᒥ;
7. ᕿᑐᕐᖓᕆᔭᐅᔪᖅ ᐃᕐᖃᑐᐃᕕᑎᒍᑦ ᓅᑎᑕᐅᓯᒪᒍᓂ, ᖃᕆᐊᖃᕈᓐᓇᑐᖅ ᐊᕐᕌᒍᓕᒫᑉ ᐅᖓᑖᓄᑦ ᐃᓪᓗᒥᐅᖃᑎᐅᓚᖓᑐᐊᕈᓂ;
8. ᐊᓂᕐᕋᕆᔭᐅᔪᖅ ᐅᐃᒪᓇᕐᑐᒥᒃ ᐃᓄᓕᕆᔨᒃᑯᓄᑦ ᐅᓇᑕᒡᒑᑕᐅᓯᒪᔪᑦ ᖃᕆᐊᖃᕆᐊᓪᓚᒍᓐᓇᑐᑦ. ᐃᓄᓕᕆᔨᒃᑯᓄᑦ ᐅᐃᒪᓇᕐᑐᒥᒃ ᐊᓂᕐᕋᐅᖃᑦᑕᕈᓐᓇᓂᕋᕐᑕᐅᒋᐊᖃᕐᑐᑦ ᐊᓪᓚᓯᒪᔫᑎᓪᓗᒍ ᑐᓂᓗᒍ ᑲᑎᕕᒃ ᓄᓇᓕᓕᒫᑦ ᐃᓪᓗᓕᕆᔨᖏᓐᓄᑦ ᐊᕐᕌᒍᑕᒫᑦ ᑐᓂᔭᐅᖃᑦᑕᕆᐊᓕᒃ ᔪᓓ 1-ᒥ. ᐊᓂᕐᕋᐅᔪᖅ ᐊᓪᓚᑖᕐᑎᑕᐅᒍᓐᓇᖏᑉᐸᑦ ᐃᓄᓕᕆᔨᒃᑯᓄᑦ ᐅᕝᕙᓗᓗᓐᓃᑦ ᐅᐃᒪᓇᕐᑐᓯᐅᕐᑎᐅᒍᓐᓀᕈᓂ ᓄᑦᑎᑕᐅᒐᔭᕐᑐᖅ ᐊᓯᐊᓄᑦ ᐃᓪᓗᒧᑦ ᒪᓕᓪᓗᒋᑦ ᒪᓕᒉᑦ 1990-ᒦᑦᑐᑦ ᑯᐯᒻᒥ ᐃᓅᖃᑎᒌᓐᓂᒧᑦ ᐱᖁᔭᐅᔪᓂ, ᓈᒻᒪᒋᔭᒥᓄ ᐃᓪᓗᒧᑦ ᓄᑦᑎᑕᐅᓗᓂ.

ᐅᖃᕐᑕᐅᓯᒪᒻᒪᑦ ᐱᖁᔭᒥ 1990 ᑯᐯᒻᒥ ᐃᓅᖃᑎᒌᓐᓂᐅᑉ ᐱᖁᔭᖏᓐᓂ, ᑲᑎᕕᒃ ᓄᓇᓕᓕᒫᑦ ᐃᓪᓗᓕᕆᔨᖏᑦ “ᖃᖓᑐᐃᓐᓇᑯᑦ ᐊᑦᑕᑐᕐᑎᐊᒥᓂᒃ ᓅᑎᑦᓯᒍᓐᓇᑐᑦ ᐃᓪᓗᖃᕈᓐᓇᐅᑎᖏᑦᑕ ᐅᖓᑖᓅᕐᓂᐸᑕ ᖃᕆᐊᖏᑦ ᑕᕐᕿᓂᒃ ᐱᖓᓱᓂᒃ ᑐᓴᕐᑎᓯᒪᕐᖄᓗᒍ. ᑖᒃᑯᐊ ᐊᑦᑕᑐᐊᖃᕐᑐᑦ ᓄᑦᑎᑕᐅᒍᒪᖕᖏᑯᑎᒃ ᑐᓴᐅᒪᑎᑕᐅᓕᕐᓗᑎᒃ ᐃᕐᖃᑐᐃᕕᒻᒨᕈᓐᓇᑐᑦ ᑐᑭᑕᕈᑎᐅᔪᕕᓂᕐᓂᒃ ᐊᓯᑦᔨᒋᐊᕐᑕᐅᖁᔨᒍᑎᒃ”.

ᐊᑕᐅᓯᒋᐊᓪᓚᒥᒃ ᖃᕆᐊᕐᑖᒍᓐᓇᑐᑦ 7-ᒦᑦᑐᑦ 8-ᒥᓗ ᐊᑐᕐᑕᐅᑐᐊᕐᐸᑕ ᑐᑭᓯᓇᕐᑎᑕᐅᓂᖓᒍᑦ.